UPDATED 2nd MARCH 2026 8:10 PM

ప్రభుత్వం సీరియస్..

విధి నిర్వహణలో నిర్లక్ష్యం వహించినందుకు కఠిన చర్యలు

​పెద్దాపురం (రెడ్ బీ న్యూస్), మార్చి 2 : కాకినాడ జిల్లా సామర్లకోట మండలం వేట్లపాలెంలో ఇటీవల చోటుచేసుకున్న ఘోర బాణాసంచా విస్ఫోటనం ఘటన రాష్ట్రవ్యాప్తంగా సంచలనం సృష్టించిన సంగతి తెలిసిందే. ఈ దుర్ఘటనపై ప్రభుత్వం అత్యంత కఠినంగా వ్యవహరిస్తోంది. విధి నిర్వహణలో తీవ్ర అలసత్వం ప్రదర్శించినట్లు ప్రాథమిక విచారణలో తేలడంతో, పెద్దాపురం రెవెన్యూ డివిజనల్ అధికారిణి (RDO) కె. శ్రీరమణిని సస్పెండ్ చేస్తూ ఉన్నతాధికారులు ఆదివారం సాయంత్రం ఉత్తర్వులు జారీ చేశారు.

ఘటన నేపథ్యం: ప్రాణ, ఆస్తి నష్టంపై ఆగ్రహం​

ఫిబ్రవరి 28న వేట్లపాలెంలోని శ్రీ సూర్య ఫైర్ వర్క్స్ బాణాసంచా తయారీ కేంద్రంలో భారీ పేలుడు సంభవించింది. ఈ విస్ఫోటనం ధాటికి ప్రాణ నష్టంతో పాటు భారీగా ఆస్తి నష్టం జరిగింది. నిబంధనలకు విరుద్ధంగా తయారీ కేంద్రాలు కొనసాగుతున్నా, క్షేత్రస్థాయిలో తనిఖీలు నిర్వహించడంలో రెవెన్యూ యంత్రాంగం విఫలమైందని బాధితులు, స్థానికులు ఆరోపించారు. ఈ క్రమంలో ప్రభుత్వం ఈ ఘటనపై లోతైన విచారణకు ఆదేశించింది.

​నిర్లక్ష్యమే కొంపముంచిందా..?

​బాణాసంచా తయారీ కేంద్రాలకు అనుమతులు ఇవ్వడం, వాటి భద్రతా ప్రమాణాలను ఎప్పటికప్పుడు సమీక్షించడం ఆర్డీవో పరిధిలోని ముఖ్యాంశాలు. అయితే, వేట్లపాలెం ఘటనలో భద్రతా నిబంధనలను గాలికి వదిలేసినట్లు విచారణాధికారులు గుర్తించారు. క్షేత్రస్థాయి అధికారుల పర్యవేక్షణ లోపం వల్లే ఈ ఘోరం జరిగిందని భావించిన ప్రభుత్వం, బాధ్యులను ఎవరూ వదిలిపెట్టకూడదనే ఉద్దేశంతో ఈ సస్పెన్షన్ నిర్ణయం తీసుకుంది. ​శాంతిభద్రతల పరిరక్షణ, ప్రజా భద్రత విషయంలో నిర్లక్ష్యం వహించే ఏ అధికారినైనా సహించేది లేదని ప్రభుత్వం తన ఉత్తర్వుల్లో స్పష్టం చేసింది. అధికారుల నిర్లక్ష్యం వల్ల సామాన్య ప్రజల ప్రాణాలు గాలిలో కలవడం పట్ల ముఖ్యమంత్రి కార్యాలయం సైతం తీవ్ర అసహనం వ్యక్తం చేసింది. శ్రీరమణి సస్పెన్షన్ ఉత్తర్వులు తక్షణమే అమల్లోకి వస్తాయని, ఆమె హెడ్ క్వార్టర్స్ విడిచి వెళ్లకూడదని ఆదేశాల్లో పేర్కొన్నారు.

కొనసాగుతున్న విచారణ

​శ్రీరమణి సస్పెన్షన్‌తోనే ఈ ప్రక్రియ ముగిసిపోలేదని, ఈ ఘటనపై తదుపరి విచారణను వేగవంతం చేస్తామని ఉన్నతాధికారులు వెల్లడించారు. ఈ పేలుడుకు సంబంధించి మరికొంతమంది క్షేత్రస్థాయి అధికారులపై కూడా వేటు పడే అవకాశం ఉన్నట్లు సమాచారం. జిల్లా కలెక్టర్ పంపిన నివేదిక ఆధారంగా ఈ చర్యలు చేపట్టినట్లు తెలుస్తోంది.